白鴿黨創黨十六年來，日前「破冰」首次同中聯辦副主任李剛會面，好多人都追尋幕後穿線嘅人係邊個？有傳呢個係根正苗紅嘅重量級建制派人士，內地人脈甚廣兼深得中央信任。近日我哋八到，呢位中間人係基本法委員會副主任梁愛詩。尋日我哋撞到詩姐喺中環曬相，問佢係咪中間人，佢話：「傳就由得人傳喇，冇乜所謂！」佢冇承認亦冇否認。
我哋再問中聯辦同白鴿黨可唔可達成共識時，佢就話：「我點知吖，我又冇去開會。」佢仲用疊啱啱曬嘅相遮住塊面唔肯上鏡。其實，詩姐係基委會成員，全國人大常委會副秘書長喬曉陽又身兼基委會主任，兩人成日開會見面，搵詩姐做中間人，真係合情合理。
咁詩姐尋日曬乜嘢靚相呢？佢話啱啱去完上海世博，想盡快曬番啲相出嚟。只見佢入到太子大廈二樓一間曬相舖，施施然一手一腳攞張記憶卡出嚟，仲自助揀相，然後攞咗疊之前曬落嘅相，前後大約五分鐘搞掂，證明年紀大唔一定係IT盲。