網誌死撐政改辯論

煲呔曾篇網誌題為「一切始於2005年……」，佢話實現市民嘅普選願望，係佢嘅使命、天天背負嘅十字架，近日「社會出現唔少陰謀論、分化論、無間道論」，但佢選擇同余若薇辯論係想將政改方案全面向市民陳述，佢引用《聖經》嘅句語：「心裏潔淨的人是有福的」，話只要心清意誠，再多風雨，都可以做到宋朝文豪蘇軾詞中「一簑煙雨任平生」嘅境界。

讀番書、做過孤獨推銷員嘅煲呔曾今次拋出蘇東坡嘅詞，真係令人耳目一新，可惜佢嘅文膽冇清楚解釋，蘇大才子被貶黃州，三年後作呢首詞時先有「一簑煙雨」嘅覺悟，煲呔曾引其詞句，係預見自己被貶，定係早早做定準備呢？點都好，聲稱孭住十字架嘅佢，尋日就畀香港天主教正義和平委員會、香港天主教勞工事務委員會、香港基督徒學會組織多個宗教團體發表聯合聲明批評唔投票、帶頭破壞選舉法治。