立法會廠商會代表林大輝喺政壇密謀組班，我哋尋日踢爆佢嘅社區聯盟叫「C18」後，大輝尋日返立法會開會時，一聽到C18嘅提問就詐傻扮懵，又否認自己係召集人，話佢充其量只係一個「參與得多啲嘅人」，至於團體嘅詳情，佢就以一句「《東方日報》知得詳盡過我」作回應！
問到佢幾時會正式宣布成立，大輝話依家「十畫都未有一撇」，時機成熟時就自然會同大家講。不過據我哋所知，C18由舊年中已經開始籌備，又點會未夠成熟呢？大輝見我哋知得咁詳盡，惟有轉口風話十畫都有大畫、細畫之分，咁依家到底欠邊筆呢？佢都係笑而不語。
呢個地區網絡咁龐大，係咪為嚟緊嘅區議會、立法會甚至行政長官選舉鋪路呢？大輝一聽，即刻笑笑口話大家諗多咗，不過，仍然係冇承認亦冇否認，只係話一班朋友聚埋係為開心，唔係為其他嘢喎！一班政圈人士租埋辦事處嚟開心一聚？搵邊個信呀？