闖直播室遭電郵狂轟

阿Paul尋日致立法會主席及全體議員嘅信件，質疑社民連三子早前喺立法會宣誓嘅有效性，指佢哋讀誓詞時刻意加料，又故意甩甩漏漏，又冇簽署誓詞，所以阿Paul要求律政司同立法會法律顧問澄清，到底社民連三子嘅宣誓係咪有效？會唔會影響立法會全體議員嘅合法性等。

佢撩起呢啲法律爭拗，社民連三子又要煩多一瓣，事關法律爭拗可能有排拖，阿Paul似乎有意同社民連三子慢慢鬥落去。

不過，佢自己一啲都唔好過，事關早前衝入商台直播室之後，佢嘅行為都引起一啲非議，尋日立法會秘書處更向議員發出通告，話申訴部收到最少四十一封一模一樣嘅電郵，內容係投訴阿Paul當日衝入直播室嘅行為，佢身為議員做出上述行為會為青少年帶來不良影響，仲要求廉署同立法會進行調查、彈劾，甚至譴責。

不過，呢封措詞嚴厲、聲討阿Paul行為嘅信件，雖然以文雅嘅用詞指摘事件「敗德」，又處處從影響青少年着眼，但係信中竟將廉政公署寫錯為「廉正公署」，可謂另一個壞示範。點都好，依家雙方嘅廝鬥已經由選舉場移師立法會，一舉一動都受到公眾監察，雙方會唔會收斂啲？或改變策略，真係要拭目以待。