怕歸怕，醜婦始終要見家翁。嗱，香港大學最新民調出爐嘞。唔好意思，煲呔曾民望繼續插水，調查顯示，過半數市民反對煲呔曾出任特首，係佢○五年上台後首次，而不滿特區政府表現嘅受訪者亦創下其任內新高，為曾政府管治敲響警鐘。

因乜事煲呔曾民望會跌到阿媽都唔認得呢？無他嘅，佢上台以來，淨係識得吹水，乜嘢實事都唔做，經濟民生瓣瓣唔掂，近排推動政制改革又頭頭碰着黑，要中央政府出手打救，民望有乜法子唔跌呀。

先講政改，正如港大民意調查計劃負責人話齋，今次影響煲呔曾民望下跌，與佢對政改嘅態度及對補選嘅取態、補選本身嘅效應及政府嘅宣傳策略有關。

本來推銷政改方案係政府不可推卸嘅責任，可惜煲呔曾該做唔做，唔該做又做，面對激進反對派推動所謂五區公投，佢束手無策，好彩大部分市民冇上當，令鬧劇草草收場。政府本來應該利用呢個機會同各界溝通啦，點知煲呔曾唔知抽起邊條筋，忽然心口掛個勇字，單挑「公投」總發言人余若薇。有學者警告，如果佢喺電視辯論表現欠佳，民望或會進一步急挫，咁咪即係捉蟲囉。

煲呔曾唔嗲唔吊，中央睇唔過眼，只好親自出手同反對派溝通，令煲呔曾冇晒面。難為佢仲好意思將推動政改列為本屆政府最重要任務，話要玩鋪勁添。叮！

政改唔掂，經濟民生亦係交白卷。樓價高企，市民媽媽聲，但係煲呔曾唔單止乜都唔做，仲猛講風涼話，佢話市民買樓心態好奇特，樓價高企時個個搶住買，樓價下跌就冇人買，令政府好難做咁話，激到望樓興嘆嘅市民生蝦咁跳。

更慘嘅係，近排香港治安七國咁亂，市民生命安全都冇保障。呢，葵盛東邨早排嗰單斬人血案就夠晒恐怖，疑兇由六樓殺落地下，見人就斬，十幾分鐘就造成二死三傷。 咁樣嘅事經常發生，市民冇晒安全感，直情對政府失望。

所以話啫，煲呔曾民望插水都係事出有因嘅。俗語有話，市民心中有把尺，邊個好邊個壞都一清二楚。不過，今次民望插水嘅後果更嚴重，按港大標準，反對率超過五成就係「表現失敗」，咁即係話，煲呔曾已經唔合格，當奴鴨已淪為跛腳鴨。

實際上，煲呔曾民望跌到老懵董落台前夕嘅水平，亦即係話，佢嘅腳病已經開始發作，唔使幾耐就要返屋企抱孫嘞。