杏林兩大高手、中文大學醫學院院長霍泰輝同行會成員梁智鴻尋日出席同一場合，兩個醫界高手互笠高帽之餘，仲百無禁忌攞自己講笑。
金刀梁尋日參觀中大喺威爾斯醫院嘅微創手術培訓中心後，講笑話要報名學吓點樣用機械臂同病人切前列腺癌，但驚中大嫌佢老，會唔收佢學嘢。霍泰輝見金刀梁咁支持，猛讚佢係前列腺癌先驅，唔單止以中大名義送咗把小銀刀畀佢留念，仲話第時年紀大咗有機會做手術，都會第一時間諗起金刀梁。
年過七旬嘅金刀梁跟住同接受機械臂切前列腺癌嘅康復者分享感受，佢問身邊兩位患者做完手術仲有冇漏尿後遺症，兩位已屆七旬嘅長者一本正經咁回答，點知金刀梁卻話：「你哋做完手術都係漏一、兩滴，我冇做手術都漏一、兩滴喎！」咁都得？