政改方案嘅討論日趨激烈，日前中聯辦罕有咁向白鴿黨伸出橄欖枝，促成白鴿黨創黨十六年來，首次破冰式見中央官員，由過去嘅暗啞抵到今日嘅公開見面，白鴿黨梗係好重視，參加會面嘅三人更不約而同變身添。主席鐵頭仁原來見面前幾日，「咁啱」恤過髮，衣着隨便嘅張文光就打咗近一年冇打過嘅領呔赴會，甚至一向着慣火紅大橙戰衣嘅劉慧卿，都以一襲溫文婉約嘅長裙赴會，話呢個約會好姿整真係冇錯㗎。
不過，鐵頭仁同劉慧卿雙雙否認有刻意打扮過，劉慧卿更加笑笑口否認話「扮你個頭」。
張文就好老實咁話，鐵頭仁喺會面前提醒佢要執正啲，同埋記得要打領呔，所以佢全部照辦，但套西裝都係平實款。至於鐵頭仁就形容自己套西裝係「爛鬼」西裝，瞓街抗爭時，都係着呢套。
喺議會中惡慣嘅卿姐就一向着套裝，顏色仲係火辣為多，但係前日佢就着杏色外套加長裙，睇起上嚟溫柔咗好多，問番卿姐，佢就話條裙已經買咗十幾年，咁係咪專登着長裙見中央官員呢？佢就話「發你個夢」！