本文重點
立法會「五散人」之一嘅廠商會代表林大輝做過足球隊班主，估唔到喺政壇都有組班嘅行動。據悉，佢舊年已經秘密籌組咗個名為「C18」嘅非政黨地區聯盟，並擔當召集人，喺全港十八區物色不同黨派或獨立區議員加入，至今已有三十多人。「C18」係議政團體，有唔少中聯辦同特區政府官員畀面撐場。
「C18」開會 搵中聯辦撐場
「C18」嘅「C」代表Community（社區），「18」代表十八區，身兼沙田委任區議員嘅大輝以沙田區作為根據地，依家三十幾名成員中，有各政黨及獨立議員，沙田區有身兼藥劑師嘅新論壇龐愛蘭、身兼小學校長嘅獨立議員湯寶珍等。聯盟喺灣仔一間私人會所每月開一次會議，討論當前社會熱門議題，中聯辦官員同唔少司局長都出席撐場，好似政制及內地事務局嘅林瑞麟、運輸及房屋局嘅鄭汝樺，甚至勞工及福利局嘅張建宗都畀面出席。
至於大輝喺立法會嘅「五散人」老友，就擔任顧問出謀獻策。有聯盟成員透露，大輝已放低所有生意，專心搞政治及籌組聯盟，並已覓得觀塘開源道一座工商業大廈嘅單位作聯盟總部，據聞大輝會喺六月下旬正式將聯盟公之於世。