政圈揣測，煲呔曾主動單挑，可能係想效法台灣嘅馬英九咁絕地重生，憑辯論擊敗民進黨主席蔡英文，民望亦慢慢回升。不過，呢一幕喺香港重演嘅機會真係好低。即使建制派議員前晚同煲呔曾共餐時又做師爺、又做諍友都冇乜用。有議員引述，飯局之上，有議員嗌煲呔曾唔好喺辯論中發脾氣，又有人認為佢要適時表露真性情，等電視機前面嘅人感受到佢嘅真誠。

當晚亦有出席飯局嘅前高官葉劉淑儀就話，煲呔曾呢一戰真係好輸蝕，可以話係「高風險、低回報」嘅戰役。佢解釋話，煲呔曾身高唔及對手，視覺上已經輸咗；而男女同場辯論，男方詞鋒如果太銳利，可能畀人冇風度嘅感覺；即使辯論策略，男方亦唔容易用感性呢招，因為男性聲淚俱下嘅本事從來都唔及女人。

余若薇最叻笑笑口殺敵

另一個政圈資深大狀曾經喺法庭同余若薇打過幾次交道，佢就認為，余若薇喺法庭裏邊，最叻係笑笑口殺你個措手不及，所以好多詞鋒銳利嘅大狀對住余若薇都係老鼠拉龜，煲呔曾冇受過法庭辯論訓練，又好易沉不住氣，贏面其實真係唔高。

佢仲用上次特首選舉嘅辯論為例，話梁家傑喺法庭嘅表現「平平無奇」，煲呔曾都贏唔到佢，言下之意，係今次呢仗實更難打。更何況，當權者同平民辯論，必須贏好多先可以令外界感到佢真係贏咗，一句講晒，呢位資深大狀都係唔睇好煲呔曾喇。

政圈反應咁一面倒，睇嚟煲呔曾今次真係攞嚟衰囉！