為學生提供安全上課嘅環境，教育局責無旁貸。但過去四年，本港涉及教師被判性侵犯學生罪成嘅案件有幾十宗。為人師表變衣冠禽獸，寧靜校園變色狼天堂，學生返學校點安心？家長又點會放心呀？

由於社會愈來愈關注，當局提出防止有性罪行紀錄教師繼續任教嘅新措施。教育局日前向全港中、小學簡介招聘教師嘅最新程序，建議學校喺合約內增加條款，要求有刑事紀錄或喺任職期間被刑事起訴嘅教師必須申報，瞞報即炒；又建議學校透過教師電子服務帳戶查核新請教師註冊有冇問題，有甩漏亦可事後「補鑊」；學校可以喺教師離職信加插「即時解僱」、「解僱」等原因，提醒新學校注意；校方亦可以喺入職申請表註明，有權向申請人前任僱主查詢佢嘅表現。

叮！「新四招」睇來睇去都唔覺有乜新意，淨係得個「卸」字，無非係將甄別有性犯罪紀錄教師嘅責任推晒畀學校啫。要羊仔自己（目及）住啲狼？真係搵笨夾靠害咯。

講真，阻止校園風化案問題惡化關鍵係防範，本港保護兒童組織多年來不斷要求當局公開性罪犯資料，等學校同補習社可以翻查，避免請咗曾干犯性罪行嘅教師，但港府一直以人權及私隱為由置之不理。家陣推出所謂新招，原來不過係新瓶舊酒，將踩過界、觸及私隱條例呢啲風險卸到一乾二淨，統統由學校承擔。

當局要學校做醜人不特止，至弊搵笨招數絕大部分都要靠教師嘅誠信至發揮到效用。如果應徵者唔主動申報有性罪行紀錄，又一直冇被踢爆，學校根本無從獲得有關資訊，無辜學童更加成為一隻隻等住狼嚟開餐嘅羊仔。

至於喺離職信加插「解僱」一類原因提醒新學校注意呢招，同樣係戇居。嗱，如果有教師喺任職期間衰鹹濕，被揭發干犯性罪行，十個有九個都主動遞信走人啦，仲等炒魷咩，如果離職信寫明原因只係「辭職」，試問又點阻止到「色狼」重返校園？點保護到學生呀？

前年本港有曾因非禮女童被判刑嘅男教師，坐完監之後居然獲得另一所中學聘用，重執教鞭成個學年之後至被發現。校方無從知道佢以前做過乜，同學更加唔知自己日日同色狼共處一室，萬一出事，邊個孭鑊？

計太一叮話齋，當局靠學校自保嘅卸膊防狼術，根本阻止唔到校園性罪犯為所欲為，唔怪得班高官個個都將仔女送晒去外國讀番書啦。叮！