科學同醫學冇得比較

科大啱啱喺亞洲大學排名中，由第四位躍升至第二位，即係緊貼香港大學。科大校長陳繁昌尋日喺大氣電波畀主持人問到，有冇諗過同有「百年老店」之稱嘅香港大學「交換位置」，陳校長好謙虛咁話：「唔可以比較，科大嘅科學同商科出色，港大就醫學出色，況且學校歷史同性質都唔相同。」

咁佢又講得啱嘅，試問叫揸手術刀嘅換轉揸燒焊器，或掉轉又得唔得吖！根本係兩回事。

陳校長仲話，回歸做校長最唔習慣係要應酬，但為咗配合「三三四學制」，學校將會加建宿舍、研究學院，仲有籌款活動等工作，睇嚟真係有排忙。

講開又講，原來陳校長細時都捱過「一步難，一步佳」嘅日子，佢憶述兒時生活好似電影《歲月神偷》咁。當時佢屋企住喺筲箕灣木屋區，周圍冧山泥係好正常嘅事，每逢打風仲要驚個屋頂畀大風吹起，最深印象係當年十號風球溫黛吹襲本港，身為家中長子嘅佢要負責用「威也」綁住屋頂同門窗、入定啲罐頭豆豉鯪魚，同埋安排女士們去石屎大廈避風，男丁就要留守屋企，依家諗番都幾有趣。