由於匯賢智庫成員陳岳鵬過檔做特首辦特別助理，佢喺南區區議會薄扶林選區嘅議席要搞補選填補空缺。匯賢智庫當然想由自己友接番個位啦，但泛民主派對呢個議席都虎視眈眈，社民連「維園阿哥」任亮憲同公文袋都積極考慮出戰。
維園阿哥尋日喺「城市論壇」結束後話，雖然社民連主席陶君行已經表示支持佢參選，但要過埋社民連行政委員會嗰關，加上公文袋都有意派人參選，所以暫時未知泛民由邊個出選，一切要等下月初嘅協調會議傾完先可作實。佢仲建議，不如搞一次泛民陣營內嘅初選武林大會，進行公開辯論，用票數決定邊個代表泛民參戰喎！
至於匯賢智庫嗰邊，理事會主席葉劉淑儀話仲未決定邊個出選，遲啲會同智庫內有參選經驗嘅人傾吓，亦會同傳聞考慮派人出選嘅富貴黨協調。睇嚟泛民同建制派仲喺度盤算緊派乜嘢人參選喎！