尋日更加有講法話，煲呔曾以為「公投」投票率低就可以乘勝追擊，因住冇着數之餘仲掉番轉頭攞自己條命！事關宣布搞辯論之後，冇建制派表示贊成，肯定事前冇同過建制派溝通取得默契，就連政府嘅「人肉錄音機」、政制及內地事務局局長林公公都話無奈同唔關佢事，而且呢場辯論好明顯同最近中央與普選聯「有得傾」嘅氣氛下散發咗啲混亂嘅訊息，所以有人話，辯論如果最後爛尾，都係好自然嘅發展。

煲呔曾唔知有意抑或無意眼高手低早有前科，除今次刻意抬高余若薇外，近嘅有五一六立法會補選前夕出新聞稿話唔投票，客觀效果係激發咗一啲選民去投票，遠嘅有○八年立法會選舉前一手炮製擴大問責制風波，洞察世情嘅「金勞詹」詹培忠當時話，擴大問責制單嘢令保皇黨失分、民主派得分，影響○八年立法會選舉，金勞詹當時已經懷疑煲呔曾係民主派嘅「無間道」，如果同一思路，今次都係如出一轍啫。