港大護理學院尋日搞咗個步行籌款活動，行政會議成員「金刀梁」梁智鴻着咗對皮鞋出席，原來佢為咗應付兩個性質唔同嘅場合，專登揀咗呢對仿皮面嘅膠底鞋，方便行山之餘又見得人，佢笑言：「呢啲咪叫做裝假狗囉！」
話說喺十幾年前，金刀梁偶然喺銅鑼灣糖街發現咗一間叫Follonica嘅本地鞋舖，佢哋嘅自家製皮面膠底鞋唔單止啱晒佢心水，每對仲只係賣六十蚊，而尋日佢着住嘅「裝假狗皮鞋」就係Follonica嘅出品嘞。
雖然Follonica有金刀梁呢個長期粉絲，但難逃要結業嘅命運。三年前，鞋舖老闆坦白同金刀梁講，話佢哋抵受唔住加租，就快唔做，又話依家仲有六、七對存貨，睇吓佢有冇興趣，金刀梁二話不說就買晒佢哋嘅現成存貨，依家仲有四對喺屋企看門口。
由金刀梁「買鞋的故事」睇嚟，就知道佢係一個非常長情嘅人，兼專捧執笠牌子。其實佢以前都講過，曾經去過啲舊式眼鏡舖，一次過入咗幾副佢戴開嘅粗黑膠框眼鏡。