職工盟啱啱選咗新一屆執委會，加上今年又係職工盟成立二十周年，尋日特登同傳媒見面。職工盟秘書長李卓人一直扎根新界西，今年就想加多一區，派人出戰埋新界東，但係人選就未定，阿人話內部都只係作出初步討論，一切未有定案。

貪嗰度多打工仔

其實，現任副主席郭紹傑喺○七年曾經出選區議會沙田廣康選區，但最終落敗，阿人都承認職工盟選舉嘅弱點係冇樁腳，揀新界東純粹係因為嗰度多打工仔，完全冇考慮過可能會硬撼工聯會嘅葉偉明，佢話呢啲只係職工盟嘅部署，又話職工盟嘅票源同工聯會唔同喎！

本來新界東嘅選情已經七國咁亂，白鴿黨要保住現有三個席位，建仔亦要攞番兩席，跟住仲有社民連、公文袋，唔好唔記得富貴黨可能捲土重來，可以話係僧多粥少，依家再加埋工會插多兩隻腳落嚟，周圍搶票，睇嚟新界東嘅戰況真係亂上加亂。

講乜都冇用，行軍打仗，糧草先行，選舉最大問題梗係錢啦，加多一區最少要多八十至九十萬元開支，職工盟近年先做到滅赤，達致收支平衡，點樣搵多啲收入呀？阿人話做多啲月捐，希望由依家嘅三百人增加到一千人，同埋開多啲收費課程，改善收入情況。

對家工聯會會長吳秋北之前表明要走工黨路線，職工盟新主席潘天賜話佢哋一向走獨立工運路向，唔係要組工黨先能夠達成工運嘅目標。阿人就話以職工盟嘅資源，根本冇餘力去支持參政同發展工黨。之不過，職工盟推行嘅「三年拼」今年踏入第二年，希望依家十七萬會員人數可以再增加一成，能夠壯大聲勢喎！