小白觀點:變態金剛唔知為乜

有人將自己亡命飛車嘅片段放上網，時速最高達244公里，見車過車，左穿右插。查實呢啲「狂派」變態金剛，喺香港嘅公路上不知有幾多，佢哋不時喺香港秋名山、觀塘首都低低能能咁亂舞，都唔知為乜。

我好同意網友「扮勁」所講，飛車好威咩？不如搵個山邊，以300km/h撼埋去，成架車total lost，竟然仲可以爬番出嚟，手腳齊全冇四散喺地，個肚冇流咗一泡腸出嚟，個頭冇劈開腦漿狂噴，咁就堅勁喇！

除咗死飛仔片車之外，醉駕亦係一個好嚴重嘅問題，「開車不喝酒，喝酒不開車」唔係同「道歉時要露出胸脯」一樣係常識咩？真係唔明，點解有父母會飲到醉醺醺仲揸車，攞自己一家大細嚟較飛，睇見個小朋友嚇到標尿，真係陰功，如果有得畀佢揀，寧願獨留在家安全得多呀。

Blog:http://sunsiupak.blogspot.com

阿豪觀點:反高鐵人士嘅傑作

終於喺YouTube睇咗嗰段題為《fd2～～大欖隧道》嘅短片，嘩！架私家車時速超過240公里？係真唔係呀？我見佢過其他車都唔係好快咋喎，除非喺佢前面啲車都有180km/h啦！豪伯從來冇諗過可以喺香港揸到咁快，以咁嘅速度，揸番上廣州都唔使好耐……咦！唔通係反高鐵人士嘅傑作？

不過點講都好啦，呢度始終係馬路，唔係賽車場，開到咁快咪盞累人累物。事實上，就算唔係開到240km/h，深夜時分經常都有人揸住架賽車呼嘯而過，仲經常將個引擎開到嘈過架飛機，討厭指數達到一千。每遇到呢個場面，豪伯心裏面都會嘀咕：「唓！好叻咩？」繼而希望佢架車接觸到燈柱、山邊一類行駛中車輛唔會接觸到嘅地方—當然啦，一人做事一人當，前提當然係車上得佢一個人啦！

Blog:http://lukchiho.blogspot.com

網友觀點：條片相信係內地同胞嘅製作，造假係佢哋強項！

巴士佬：心智未成熟嘅司機睇完去模仿，咁就大件事……

扮　勁：時速244公里撞埋山唔死得，就真係勁嘞！

秦先生：時速244公里撞埋山唔死得，就真係勁嘞！

羊咩蘇：手車咁辣，佢係咪揸開小巴o架？