大家唔好以為呢種場面離香港好遙遠，其實類似慘劇完全有可能喺我哋身邊發生。現時全港有三百架設有大型油缸嘅運油車，由於法例有漏洞，加上當局監管不力，一架架運油車等於一個個計時炸彈，隨時出事o架！

本來法例規定，車輛如果載有汽油等危險品，無論乜嘢時候都要有專人看管。之不過，本報記者日前巡視咗全港多個停車場，發現泊咗唔少運油車，油缸都裝咗汽油，但並冇人看管。

叮！咁搞法好牙煙啫。正如有學者話齋，汽油嘅燃點好低，攝氏六十度就可以着火，如果運油車附近有火頭，油缸裏面嘅汽油就會受熱迅速膨脹，直到爆炸。

嗱，上月將軍澳一個露天停車場懷疑電線短路起火，火勢蔓延得好快，差啲波及泊喺停車場嘅一架運油車。好彩消防員及時趕到將火救熄，否則後果不堪設想。

實際上，呢啲驚險場面已經唔係第一次出現，○六年至今，最少有五架泊喺露天停車場嘅運油車突然起火，或被附近火勢波及而着火，甚至爆炸。最嚴重係○六年五月發生嘅一單，八鄉粉錦公路露天貨場兩架運油車無啦啦起火爆炸，炸到地動山搖，山搖地動，兩個工人走唔切，被炸到重傷。

話時話，咁多運油車違例停泊，點解冇人理嘅？叮，咪就係因為負責執法嘅消防處做嘢懶懶閒咯。有資深消防員踢爆，處方好少巡查運油車，除非有人投訴，否則好難知道運油車有冇危險品。

人命關天，消防處對運油車唔監唔管，直情係攞市民條命較飛。其實，消防處不嬲都慣咗出事至補鑊，對運油車嘅監管係咁，對大廈及食肆嘅監管亦係咁。申訴專員公署曾經狂批消防處對食肆消防安全「管理落後、監管不嚴」，講出嚟好多人都唔信，該處竟然要花四十年時間至可以將全港二萬二千幾間食肆巡查一次，問你服未！

叮佢個鎯鎯，港府官僚做嘢唔嗲唔吊，次次都要見到棺材至識流淚，唔通真係要等到發生好似肯尼亞運油車事件咁杰撻撻嘅場面，佢哋先至識緊張？