小白觀點:政府詐唔知等同幫兇

真係離譜，港鐵六月十三號起開始加價，平均加成兩個巴仙咁多，所謂「可加可減」機制，根本就係得啖笑！記得當日港鐵話過合併後點有乜鬼協同效應，可以加強服務，好嘞，過咗幾年，大家有眼睇，港鐵冇乜嘢叻，一味影裙底嘅色魔夠晒多。再講吖，政府係大股東，竟然衰到隻眼開隻眼閉詐唔知，仲要任港鐵打市民荷包，真係豈有此理！

話時話，咁樣畀人住搶，我就覺得好唔服氣嘞，唔好以為小市民好恰呀，我決定唔會向巨人哥利亞屈服！大老山隧道遲啲話要加一蚊，我決定罷過！唔想畀肥到漏汁嘅油魔咬到飛起，我決定罷駛！港鐵加價咩，我決定罷搭！行唔到咁遠返工？我決定罷工！唔好以為係晦氣說話，我計過數，反正搵搵埋埋雞碎咁多，都未必夠畀交通費，因乜事要幫港鐵油魔打工咁笨先！

Blog:http://sunsiupak.blogspot.com

阿豪觀點:推銷智能卡功虧一簣

港鐵唔理反對聲音，堅持如期喺下個月十三號起加價百分之二點零五，而政府啱啱公布嘅數據亦顯示，本港通脹率有上升迹象，睇嚟小市民有排捱咯……

豪伯認為，政府任由港鐵加價，簡直係香港之恥。首先，政府係港鐵嘅大股東，竟然由得港鐵製造骨牌效應，等其他公共事業可以有樣學樣跟住加，咁搞法，直頭係唔理小市民嘅死活呀！

仲有唔好唔記得喎，今次上海世博會裏面，香港「城市最佳實踐區」展覽嘅主題係乜嘢呀？咪就係智能卡囉！高官仲吹到天花龍鳳，話體現香港包容開放、多元進取同廣泛採用先進科技改善城市嘅生活質素同效率喎，點知話口未完，港鐵竟然鬧出八達通收費貴過單程票嘅蝦碌嘢，原因仲係戇居到無倫，話計唔到票價嘅尾數喎，單嘢傳咗出去，你話係咪丟架吖！

Blog:http://lukchiho.blogspot.com

網友觀點

車　　長：見港鐵有加冇減咁好搵，其他公共交通工具實會有樣學樣。

乃　　勤：我決定買港鐵股票，實升，因為只顧股東利益。

賓　　仔：假如市民能夠做到可搭可唔搭，港鐵肯定冇加得咁過癮！

秦先生：港鐵簡直當乘客係傻仔，搵完笨就派粒糖補番數！