本文重點
正式接管咗華懋嘅華懋集團執行董事兼管治委員會主席龔仁心，呢幾個月動作多多，上禮拜喺白加道三十五號Falconridge嘅私人拍賣會，龔仁心仲以十五點五億元率先承第一口價，成為焦點，到拍賣官宣布成交，佢又上前同買家恒基地產副主席李家誠握手恭賀，搞到大家都以為華懋同恒地合作投地。雖然最後李家誠表明，呢個項目將會係家族自用，但呢件事都講明龔家已經踩行油「做嘢」。
「做地產冇地點得？」
尋日龔仁心同太太一齊去亞洲國際博覽館，出席一個藝術古董展覽嘅開幕禮，佢話自己唔識古董，不過一講到做生意，佢就笑笑口。龔仁心話嚟緊華懋會積極買地，好似粉嶺嘅地皮，佢哋都好有興趣，仲漏晒口風話佢哋係做地產，冇地點得？睇嚟嚟緊嘅投地活動，應該會不時見到佢嘅蹤影。
喺尋日嘅開幕禮上，表演嘅南獅特登走去龔仁心伉儷面前獻技，不知幾乖巧，氹到佢哋忍唔住摸摸獅頭。龔仁心囝囝上年小登科，問佢想唔想今年抱番隻老虎仔，佢搞笑咁話自己已經有仔啦！