每逢立法會換屆嘅時候，班議員都會將用公帑買嘅物資還番畀秘書處，留畀新一屆嘅議員用二手價買番，但因為事隔四年，好多物資都好殘舊，尤其係日新月異嘅電子產品。不過五名辭職再選嘅議員，做咗唔夠兩年就劈炮，所以佢哋先前交番出嚟嘅物資，有唔少都好新淨。
立法會早兩日出文件通知議員，話有成百件二手電腦設備、手提電話、辦公室設備同家具可供選購。細心睇份清單，發現連舊年年尾買入嘅黑色16GB iPhone 3GS都有，街價賣緊五千三百八，二手價五千蚊就有交易。
其他筍貨仲有名廠三十二吋液晶體電視機，只係用咗半年多啲，由原價近五千四減到四千八；近年開始多人用嘅蘋果手提電腦MacBook Pro，一樣只係用咗半年多啲，原價近一萬三千二，二手價萬二蚊就得。
不過好可惜，呢啲「夜冷貨」係議員優先選購，即係普羅市民冇份，至於想買嘅議員就要喺呢個月二十八號前回覆秘書處，多過一位議員想買同一件貨嘅話，就要以抽籤嚟決定，抽籤結果將會喺下個月一號公布。