德成局長一心借佛誕過橋，致辭時口口聲聲話希望藉浴佛功德，除去心中固執、妄想同煩惱，又話佛法可以促進社會祥和。兜咗咁大個圈，詞鋒終於轉入正題，佢叫大家唔好再偏執於過去嘅猜疑，為香港大局着想，促使政改方案通過。講到咁白，真係司馬昭之心，路人皆見！

德成局長點解夾硬要一班與世無爭嘅善信聽晒佢話，支持政改呢！查實菩提本無樹，煩惱自尋嗰個，應該係政府自己至啱。市民怨氣沖天，都係拜無能政府所賜，班高官唔好好反省自己，竟然反過嚟叫市民咪咁執着，簡直令人啼笑皆非。德成局長推銷完就快閃，記者問佢係咪向信眾推銷政改，佢同往常一樣借咗聾耳陳隻耳，轉身走人。