立法會大樓同皇后像廣場之間通道平日寧靜閒逸，但自高鐵撥款一役，竟變成是非之地，當日反高鐵大聯盟同一班「80後」青年，就係喺呢段約五米闊嘅石屎路上搭司令台、豎大螢幕同圍攻立法會，最終釀成警民衝突。政改方案預期六月二十三號表決，民主派部署再圍立法會，該通道嘅保安問題刻不容緩，不過最基本嘅土地管理權問題，仍然糾纏不清。

立法會行管會前日開會再跟進，據悉，行政署畀立法會嘅回覆，堅持若立法會當日有會議舉行，該路段就由立法會負責管理，周末同公眾假期先至由政府接手。行管會成員話土地管理權問題唔係政府說了算，一定要文件證明，況且立法會冇槍冇炮，有執法困難，希望行政署自己識做，主動接番條路嘅管理權。