強積金制度推出至今差唔多十年，積金局尋日就搞咗個宣傳活動教市民投資，唔少同強積金歷史有關嘅嘉賓都有出席，當中見到建仔主席譚耀宗着住件好有特色嘅短袖黑色唐裝衫去撐場。一問至知，原來譚Sir件衫大有來頭，講嘅唔係出自名師之手，而係譚太喺北京旅行時專登買畀譚Sir嘅。
譚Sir話件衫其實係好幾年前買落，已經唔記得價錢，不過佢同太太平時都唔奢侈，所以相信都唔會好貴。譚Sir仲話其實好鍾意呢件唐裝衫，貪佢質料夠舒服，不過一直都冇乜機會着，皆因佢成日要去立法會開會，始終都係覺得着恤衫西褲先夠莊重，所以呢件衫成日都要好孤獨咁留喺佢衣櫃入面。適逢尋日係佛誕，加上呢個宣傳活動性質比較輕鬆，着唐裝衫就合適兼應節嘞。