呢，尋日有架巴士喺香港仔黃竹坑道，無端端畀路面換水管工程鋪設嘅鋼板擊中車底，成架彈起，超過廿人受傷；事前有另一架巴士懷疑畀呢塊鋼板撞穿油箱漏出油渣，如果燒着就大鑊。

政府監管睇漏眼，翻風落雨危險廣告牌或者棚架倒冧聽得多，估唔到路面仲有水務工程留低嘅「陷阱」，上下夾攻靠害車輛。唉，政府部門唔踢唔郁，做嘢求其是但，「陷阱」又點止黃竹坑道一個吖。

沙田大涌橋路日前發生恐怖車禍，小巴撞入行人隧道，一死六傷。沙田區議會尋日召開特別會議，議員直指事件同監管失職有關，批評政府部門「好做唔做」、「唔鬧唔做」。

呢次慘劇嘅死者因為小巴冇裝安全帶，拋出車外當堂遇難。講出嚟嚇一跳，據業界人士講，家陣全港同類舊式小巴超過二千架，裝咗安全帶嘅只有二十六架，得個零頭咁大把。運輸署話，○四年已立例要求新登記嘅公共小巴裝安全帶，並鼓勵舊式小巴加裝。

叮！真係要寫個服字，係咁意「鼓勵」下就算數，六年過咗，仲有兩千幾架舊式小巴載住無安全帶可扣嘅乘客通街飛，當局居然當冇事。應唔應該用公帑資助車主有待討論，但安全帶遲裝一日，乘客面對嘅危險就多一日，當局翹埋雙手乜都唔做，你話係咪冷血吖。

仲有呀，事發十字路口原本裝有衝燈快相機，對揸快車嘅司機可以起到阻嚇作用。舊年七月事發路段要擴闊，需要拆咗部衝燈快相機，但工程做完，部機並冇裝番。警方尋日回應話，會同其他部門研究可唔可以重新安裝，但可能「涉及技術困難」。

叮！講緊裝番部衝燈快相機啫，唔係裝衞星發射器，試問有幾困難呀？就算真係涉及技術困難，都要諗辦法搞掂啦。有困難就放棄，咁高人工請你班官返嚟做乜？更何況，道路安全人命關天，唔通呢啲就叫以民為本，服務市民？

更離譜嘅係，大涌橋路慘劇現場係咪交通黑點，部門之間居然各有各噏，連點計法都有唔同標準。運輸署按每年累積嘅交通意外數字計算黑點，警方就按每個月計。一個話唔係，另一個又話係，標準不一，資訊亂龍，司機無所適從，簡直係點紅點綠，搵市民安全較飛。

本報記者喺慘劇發生後去現場睇過，短短一粒鐘內起碼有二十架車衝紅燈或黃燈。計太一叮話齋，如果咁都唔算交通黑點，不如試吓拆晒啲交通燈，叫警方同運輸署高官輪流企喺十字路口指揮交通吖，笨！