調查白鴿黨議員甘乃威涉嫌求愛不遂怒炒女助理嘅立法會有關委員會，尋日首次傳召甘威作供。由於甘威之前選擇咗以閉門方式進行聆訊，會前所有委員都簽晒「生死狀」，承諾一定唔可以將聆訊內容外洩。
會議保安安排更加係立法會有史以嚟最大陣仗，會議室對出嗰段走廊首次全面封閉，仲有保安人員全天候把守，嚴禁任何閒雜人等停留或經過，記者只可以喺離會議室門外足足五米遠嘅地方守候，連斟茶遞水嘅服務員都唔准入內，嚴密程度仲高過特首出席答問大會，認真誇張！
甘威喺兩位律師行代表陪同下出席聆訊，作供完畢喺樓梯口一見到記者，就立即耷低頭粒聲唔出，衝入平時畀班官用嘅等候室，再由等候室側門進入會議室，散會時亦用同一途徑離開，加上會議室兩邊出口中間嘅走廊封咗，令記者兩頭跑都埋唔到佢身做訪問。
立法會秘書處解釋，由於甘威今次係以證人身份出席聆訊，所以獲安排先喺等候室等待委員會傳召，唔算刻意走後門避記者喎！