政治一日都嫌長，前日先吹勁風話中聯辦官員會喺兩個禮拜內見終極普選聯盟，展開破冰之旅，過咗唔夠二十四小時，煲呔曾尋日下戰書，單挑余若薇喺下月十七號喺政府總部進行電視辯論，點知竟然出現甩轆嘢。
話說特首辦尋日朝早去信余若薇，抬頭先寫住「立法會議員」，跟住就稱呼佢做余議員，政府新聞處喺十點半發出新聞稿，刊出呢篇戰書嘅內容，但喺新聞稿首段嘅導言，竟然稱呼余若薇做「公民黨主席」。嘩！有冇搞錯？事關公文袋主席係關信基，余若薇係黨魁。可能知衰，新聞處喺半粒鐘後出稿修訂，寫番啱余若薇係黨魁。
煲呔曾團隊唔承認變相「公投」，一直強調只係立法會補選，但係新聞稿寫明余若薇係「五區公投運動聯合委員會」總發言人，咁咪即係承認補選係「公投」囉！
表面上好似係新聞處嘅手民之誤，但諗深啲，煲呔曾下戰書畀余若薇咁大件事，段新聞稿斷估唔會由普通嘅新聞官撰寫，而係應該由特首辦親力親為，咁錯法，冇理由眼花啩！孭鑊嘅當然係特首辦主任Raymond譚志源啦！
行軍打仗最重要係認清對手，Raymond唔單止連老闆個對手都搞錯，仲一錯再錯，認真抵打！