香港青年聯會副主席朱鼎健細佬Tenniel朱鼎耀，喺加拿大多倫多大學修讀經濟後，再深造高爾夫球管理碩士，然後先至返港拍住大哥一齊發展高球業。
Tenniel從高球中悟出一套生意哲學，佢早前主持一個高球賽時話：「打高球唔同踩單車，唔係你學識咗就可以向前行，因為由風向到草紋，每一樣嘢都可以影響表現。每打一球都會有好多變化，唯一可以控制嘅係你有冇做好準備工夫。」正因為變數多，佢話保持高EQ同平常心，對打波同做生意都係好重要。
但佢亦話打高球都要享受過程，當然球同球之間可以輕鬆啲，但到揮桿一刻就一定要專心同投入，唔能夠Hea住打。
Tenniel可一心向前衝，背後嘅老婆Carmen功不可沒，事關佢由女強人變成全職主婦，相夫教子。Carmen直言唔係好慣，仲講笑咁話依家轉數慢咗，但見Tenniel身邊嘅佢笑得咁幸福，相信犧牲係值得嘅！