立法會會計界議員「波波」陳茂波向來投資有道，過往投資港股同外幣經常大有斬獲，但面對近期英鎊下跌，佢都受連累要坐艇，事關佢囝囝喺英國牛津大學讀法律，唔多唔少都會換定啲英鎊備用，波波舊年呢個時間就以十二個幾港元兌一英鎊匯價買入一批英鎊，點知依家跌到十一個二，眼白白蒸發咗一蚊，分分鐘畀囝囝使埋都未見到家鄉。
波波揸住批英鎊坐緊艇，自然唔敢趁低吸納，事關低處未算低。問佢估計英鎊幾時見底時，佢就話：「我都睇唔通呀！」
港股受外圍市況拖累，跌破二萬點水平，波波會唔會趁低掃貨呀？今次佢冇講得咁明，好玄咁話會以不變應萬變喎！莫非暗示暫時收手？
