喺政府無計可施之際，畀立法會議員鬧過成員一啲都唔年輕嘅青年事務委員會，換入咗幾個「80後」扮後生之後又有新搞作，計劃舉辦一系列嘅青年交流會，邀請相關嘅政策局代表出席，等青年就佢哋關注嘅議題同政府進行交流，大概會搞十場，每場可容納一百名青年入座。

「八國聯軍」認知度近零

青年交流會嘅頭炮定喺六月二號，而打頭陣嘅係教育局副局長陳維安，話會同青年討論免入息審查貸款計劃。至於下一個就係環境局嘅代表，邊個官嚟就未定，若以陳維安為例，睇怕環境局副局長潘潔都走唔甩。

咦！有啲蹊蹺喎！表面上，呢個係畀政府官員同青年交流嘅平台，但政府講明會喺年中評核佢哋嘅表現嚟調整薪酬，不難令人視之為畀班副局長同政治助理表現嘅平台。

老實講，呢班被嘲為「八國聯軍」嘅副局同政助上任近兩年，乜表現都冇，但就醜聞多多，認知度低到近乎零，搞到港大民意研究計劃早前宣布摺埋呢個調查，費事嘥錢同人力。喺好多立法會議員揚言要炒晒佢哋嘅情況下，佢哋點樣自保甚或爭取加薪呀？

之不過，若果佢哋視呢幾場青年交流會係爭取表現嘅平台嘅話，似乎又開心得太早嘞，事關激進嘅「80後」無處不在，先後有「掟bra男」、「掟廿蚊男」，甚至政務司司長唐唐早前出席青年事務委員會嘅青年高峰會時，都有「掟鞋男」向佢掟波鞋，所以班副局同政助輪流去呢十場交流會，可能隨時畀「80後」掟嘢，分分鐘爭取唔到表現，只係去畀人砌、畀人掟嘢同柴台，咁即係去受靶咋！