香港競爭力不濟已經唔係新聞，鄰近地區唔止逼到埋身，更加爬埋頭添。呢，瑞士洛桑國際管理學院（IMD）啱啱發表今年世界競爭力報告，表面睇香港依然保住第二，但係同其他對手後來居上嗰種凌厲勢頭相比，「亞軍」唔單止岌岌可危，直頭係難睇到痹。

「宿敵」新加坡呢次爬咗香港頭不特止，仲踢走稱霸榜首十六年嘅美國，由季軍一步到位升做冠軍。擺明唔會學香港嘅台灣又點呀？巴閉咯，如果有個「最佳進步獎」嘅話，佢哋攞硬有餘。台灣呢次連升十五級，競爭力排名由第廿三跳到第八，問你服未！內地亦唔弱，由第二十位跳兩級升到第十八，喺金磚四國中名列第一。

唉，新加坡同台灣呢兩條昔日嘅亞洲小龍，不但可以重新起飛，仲愈飛愈高。香港家陣就成條冬眠緊嘅蛇咁，冇厘神氣。報告話，新加坡於全球金融同經濟危機期間展現堅強韌性，金融海嘯後最快復甦，真係恨死隔籬咯。

叮！港府曾經吹水話本港會係區內最快反彈，但「賽果」揭盅居然係流料，當初係信口開河齋噏，定係心血來潮亂篤數，睇怕只有曾蔭權同財爺曾俊華「兩兄弟」自己至知。

睇番台灣，尋日馬英九喺就職兩周年前夕開記者會，「大步向前，開創黃金十年」嘅演講題目零舍搶眼。講真，人哋口氣大係自信，唔係自大。IMD報告已經證明馬英九「威」得有道理，近排民望止跌反彈，佢信心更加爆棚。呢啲，港府恨都恨唔到咯。

叮！香港競爭力其實一直跌緊Watt㗎喇。嗱，中國社科院前排發表今年城市競爭力報告，本港雖然第五次蟬聯榜首，但實際上喺成長競爭力、高科技產業、生活環境、公共部門競爭力等方面，已經畀內地城市爬頭。

梗係啦，香港工業得番個殼，金融業隨時被上海取代，旅遊業因為基礎設施不足，發展空間愈來愈細，科技產業連影都未見，港府施政根本冇晒方向同目標，所謂六大產業，全部都係鏡花水月，自己呃自己。花無百日紅，風水輪流轉，香港同長三角、珠三角相比，發展前景已經完全冇得揮。

台灣政治紛爭比香港有過之而無不及，但政府有承擔，官員要問責，一樣可以排除干擾，做出成績，定下「黃金十年」大計。

計太一叮話齋，煲呔曾所謂「二十年來最好」，「想窮都難」，信佢一成都死。「黃金十年」就冇嘞，乞米十年就有你份。