話說立法會大會尋日六條口頭質詢中，有四條關運房局事，包括港鐵股息同票價優惠、房屋政策、政府土地發展政策同港珠澳大橋等，邱副回答議員提問時，只係不斷重複事先準備嘅主體答案內容，好似房屋政策嗰條，會計界陳茂波、勞聯李鳳英同工聯會王國興先後追問邱副會唔會將喺港鐵收到嘅股息為殘疾人士同弱勢社群提供交通補助，點知邱副回答時一律照稿讀，話收取到嘅股息要收歸庫房，但政府會鼓勵港鐵提供票價優惠。

邱副上場後，經歷過的士堵塞機場、遷拆菜園村等事件，次次都畀人鬧到飛起，可能因為咁，令佢做事愈嚟愈驚青，依家學埋林公公做人肉錄音機，激到班議員聽完佢回覆都加多句：「佢冇答到我問題！」希望逼邱副噏多兩個字，但最終都係聽佢播多一次帶，講咗等於冇講。