香港貿易發展局尋日舉辦中國企業領袖年會香港論壇，逾百企業領袖同專家學者聚首，探討商業增長新動力，作為主人家嘅貿發局主席蘇澤光當然撐足全程，仲同大家緬懷當年派駐北京嘅經歷。
招商銀行行長馬蔚華亦現身說法，講佢經營銀行嘅創見。佢回憶七、八年前首次喺內地推出信用卡嘅過程，又提到前年斥資百幾億元跨境收購本港永隆銀行，幾個創舉總係引起市場驚呼，佢認為作為商界領袖，好應該「把握宏觀，把握趨勢」。
在座嘅財匯局主席Sophia盧高靜芝聽咗成個上晝，話咁多嘉賓之中，佢對馬蔚華嘅印象最深刻，直呼睇好招行未來嘅發展，話返去要入啲招行股票！記者將Sophia嘅心得話畀馬蔚華聽，佢好開心咁笑住話：「現在股價那麼低，當然要多買一點啦！」