本文重點
中央同終極普選聯盟決定邁出歷史性第一步，進行「破冰」溝通，見面規格備受關注。可靠消息透露，中央傾向由中聯辦副主任李剛開門見客，下禮拜會喺西環中聯辦大樓約見普選聯核心，以示願意同民主派打破雙方二十年嚟老死不相往還嘅僵局。消息指，呢個決定係由中央最高領導人拍板，只要同普選聯破冰成功，以後一切事務性事情，包括回鄉證問題都有得傾。
普選聯玩神秘
消息指出，中央最高領導人拍板，同意中央港澳工作協調小組領導提出嘅方案，進行破冰會面。中央又同普選聯達成共識，同意會面喺5．16補選後進行，但中央協調小組決定循序漸進安排中央官員同普選聯接觸，擬下禮拜選派中聯辦副主任李剛破天荒見普選聯代表。
下禮拜中聯辦見普選聯嘅規格，由位居副部級嘅李剛開門見客，顯示中央對今次破冰會面嘅重視，屆時中聯辦法律部部長馮巍亦會陪同與會。今次歷史性會面暫定喺下禮拜四舉行，到時中聯辦門外肯定又會好熱鬧。
至於普選聯尋晚開完會後，對同中央官員會面安排依然三緘其口，用鐵筆都撬唔開，話時、地、人都未定，又話尋日開會只係為今日見政制及內地事務局局長林公公作準備喎。