Ronald尋日已經返新工，唔知係咪都係做佢前手、建仔陳克勤形容嘅影印工作，但每個月七萬蚊人工袋袋平安，不知幾疏乎。但少佢份人工幾倍、津貼得嗰雞碎咁少嘅區議員席位，偏偏富貴黨、公文袋同白鴿黨都搶住要喎！

美名校修讀法律

政府將會就Ronald原先嘅南區區議會薄扶林選區議席空缺安排補選，呢個選區以中產同公務員選民居多，有地區人士估計，身兼匯賢智庫主席嘅立法會議員葉劉淑儀做過保安局局長，若果匯賢派個醒目啲嘅人出嚟選，好有機會攞番個位。

葉劉都講明會派人出戰，但仲未決定人選，只係話呢個人出自名牌大學，大家以前都見過吓佢嘅。咦！之前葉劉帶咗佢「六大門徒」出嚟見人，唯一女將就係「富貴版鄧麗欣」Karen錢嘉韻，佢喺名校加州大學栢克萊分校修讀法律後回流返港，仲係自薦入葉劉門下，亦講到明對下屆區議會選舉好有興趣，似乎佢幾近磅喎，若果真嘅話都係提早出閘啫！葉劉回應時承認Karen係其中一個考慮人選。

早前社民連有個「翻版張栢芝」，好多人都話若然「匯賢鄧麗欣」火併「社民連張栢芝」，一定成為港男焦點，但社民連嘅維園阿哥、做「炒家」嘅任亮憲，呢排炒到自己咁火紅，仲矢言會參加呢次補選，睇嚟好大機會係「匯賢鄧麗欣」火併「社民連維園阿哥」噃！

依家「80後」喺網上為選舉造勢同動員力不可忽視，如果「匯賢鄧麗欣」火併嘅對手由「社民連張栢芝」換上「社民連維園阿哥」，啲「80後」網民，尤其係啲電車男會唔會一面倒投向「匯賢鄧麗欣」呢？咁就要拭目以待嘞！