小白觀點:睇美劇隨時見蹤影

一直被特區政府冷落嘅電動車MyCar，終於吐氣揚眉，獲美國一間汽車製造商邀請入股，相信好快就打入美國市場！眾所周知，香港地搞乜都冇運行，MyCar轉身咁快，仲進軍美國為港人爭光，真係可喜可賀。

唔係講笑，話唔定遲啲睇美劇，唔單止《Lost》神秘荒島上達摩組織用MyCar呀，打不死嘅反恐猛男Jack Bauer要捉恐怖分子，周不時要搶路人甲架車，為咗環保，明明周街都係大耗油Hummer，嘿，佢係都特登搶架MyCar追壞蛋。

反正依家啲劇集成日穿崩㗎啦，好似話近日有網民踢爆，三國戰場上演一場百萬軍中藏阿斗，上空竟然有軍用直升機飛過，問你服未？如果咁都得，你話仲有啲乜嘢係唔可能吖，所以呢，小白老弟真係好期待依家播緊嗰套太平洋戰爭片《Pacific》，有MyCar搶灘呢一個歷史性鏡頭！

Blog:http://sunsiupak.blogspot.com

阿豪觀點:物離鄉貴飛撲叨光

港產電動車MyCar揚威國際，不但打入美國市場，仲獲丹麥環保旅遊島引入。好笑嘅係，特區政府之前一直對MyCar冇乜興趣，點知邱騰華日前即刻撲出嚟，話政府有興趣訂購，可惜你急人哋唔急，依家人哋主要嘅市場喺歐美，唔再吼香港市場囉……

政府一直淨係識得錦上添花，幾時見過有雪中送炭？對待MyCar就係一個例子嘞，見到人哋行情看漲，仲唔第一時間撲埋去叨光咩。中國人嘅民族性難改，正所謂「物離鄉貴」嘛，唔去外國鍍完一層金，邊度會有人當你一回事？

所以各位科研人才千祈唔好氣餒，冷落你就當係一種激勵，有麝自然香，他日你有成就，佢自然會主動上門搵番你，咁到時你就可以好似MyCar咁，叫佢耐心啲等吓，有貨自然會call你o架喇！

Blog:http://lukchiho.blogspot.com

網友觀點

周　　仔：政府官員坐慣靚車，話對MyCar有興趣咪又係整色整水！

小寶寶：如果MyCar係有豪華升級版，政府就唔同睇法喇。

哨牙車長：政府應大力提倡用電動車，實際過搞停車熄匙吖。

巴士佬：用行動支持最實際，所有高官座駕改用MyCar啦。