呢，最近大埔那打素醫院發生嗰單畸士就夠晒離譜。話說一位六十歲女士小腿生咗個膿瘡，銅錢咁大，又紅又腫，去那打素醫院急症室求診，等咗十粒鐘先至安排入住骨科病房。

病人入院時仲係有講有笑，精神幾好，點知隨後幾日膿瘡擴散到大腿同腰間，但係醫護人員好少幫佢清洗傷口或者打針開藥。問護士，就話當值醫生先至答得到，但係根本見唔到醫生。

到入院第四日，病人忽然昏迷，但醫護人員冇立即搶救，仲話「唔知發生乜嘢事，要等醫生」。後來懷疑係腦中風，轉到威爾斯親王醫院做腦部手術。手術後一直冇好轉，醫生先至話可能係腳部細菌入血，再過咗兩日，病人就去世。

呢個病人真係死得不明不白，正如佢家人話齋，入咗那打素醫院咁多日，醫生乜都唔知，又唔及早轉院，如果一早知道係腳部細菌入血，最多切咗隻腳啫，都唔使搞成咁。更離譜嘅係，病人死後，那打素嘅醫生又話，佢嘅死可能同肝炎有關。一陣話係腦中風，一陣又話肝炎，都唔知邊樣真。叮！

其實，病人嘅情況本來就可大可小，有傳染病專科醫生話，細菌入血會導致敗血症，令身體多處出血，包括腦出血。如果係食肉菌仲會產生毒素，令軟組織大範圍壞死，唔及早治理，最快二十四小時就死亡，可惜院方唔嗲唔吊，監生將個病人拖死。叮佢個鎯鎯，咁搞法，同殺人有乜分別呀！

院方至今唔肯承擔責任，淨係話已交畀死因庭跟進，又假惺惺向病人家屬致以深切慰問咁話。唉，人死不能復生，慰問有鬼用咩！

講開又講，公立醫院歎慢板延誤診治嘅事周時都會發生。舊年四月，有個四歲男童發燒、肚痛，入公立醫院留咗六次醫都查唔出病因，直到今年二月至發現係惡性淋巴瘤，但病情已惡化，好快就死亡。今年三月，有個腹腔內出血嘅中年婦女去公院急症室求診，等咗兩粒幾鐘，痛到翻白眼先至見到醫生，但已經救唔番。

呢啲擺明係醫療事故啦，但係醫管局唔處理，醫院管理七國咁亂，唔出事至奇。正如有立法會議員話齋，醫療事故頻生，病人小病變大病，甚至命喪黃泉，醫管局責無旁貸。

難怪有人話，去公立醫院求診，要打定輸數，有命返出嚟就要燒香還神。難為醫管局行政總裁蘇利民仲話，醫管局做乜嘢決定都以人為中心喎。咁樣吹水唔抹嘴，唔通唔怕死不瞑目嘅病人半夜敲門咩。