小白觀點:條件反射隨時中招

沙田大涌橋路發生奪命車禍，撞到成架小巴飛埋落隧道，懷疑可能有人睇錯燈累事。話時話，呢啲孑貝仔燈真係害人不淺，之前大埔都試過有單差唔多嘅車禍，有個的士司機可能唔太熟路，見到轉左綠燈當直行，結果連命都冇埋。

當然，司機駕駛態度都好重要，唔好下下搞到成鼻都係白色粉、飲到紅都面埋至出車吖，但係呢啲燈確係幾陰人，喺漆黑中等轉燈，忽然見到綠色一閃，好多人條件反射都會郁一郁。

小弟亦都有「豬油包」嘅稱號，手車出晒名夠晒慢，有次都差啲中咗孑貝仔燈招，依家諗起都一額汗。

仲有呀，香港嘅道路陷阱多過乜，吐露港有段路凹凸不平，試過有次行過成架車彈起，冇事真係執番身彩，唔該運輸署做吓嘢，咪搞到「路上多意外，香港冇人愛」得唔得？

Blog:http://sunsiupak.blogspot.com

阿豪觀點:道路改善愈搞愈喎

沙田大涌橋路前日有架綠色小巴畀的士攔腰撞到插落隧道，聽講係有司機睇錯孑貝仔燈而出事。所謂孑貝仔燈，即係同時有直去同左/右轉燈號嘅交通燈，司機唔熟路隨時睇錯。

大埔今年三月都曾發生過類似嘅奪命交通意外，政府又唔係冇錢，點解唔將全港孑貝仔燈轉為獨立燈號呢？

至於今次意外另一個「疑兇」，好明顯就係警方啦！據講意外地點本來係設有衝燈機影快相嘅，點知無啦啦喺○七年十一月拆咗。警方嘅解釋竟然係出事地點要進行道路改善工程，路面情況唔符合衝燈機運作嘅條件，所以之後冇重新裝配。

吓！咁都得？即係話你唔「改善」猶自可，一「改善」反而賴晒嘢，咁唔該當局以後預早少少公布全港邊區再進行道路改善工程嘞，起碼等豪伯有個準備避開吓吖嘛！

Blog:http://lukchiho.blogspot.com

網友觀點

賓　仔：亡命小巴加埋孑貝仔燈，有乜辦法唔釀成大車禍吖！

阿拉丁：政府應該拍番套宣傳片，提醒司機見到孑貝仔燈時要小心。

細路祥：將搞補選嘅公帑用嚟改善全港交通燈，造福市民好過啦！

乘　客：司機大佬留心呀，孑貝仔燈隨時係死亡陷阱嚟㗎！