喺立法會補選結果公布當晚，出戰九龍西嘅「白姐姐」白韻琹上台謝票時，畀社民連「紅衫軍」喝倒采，大罵「無恥」兼用粗口問候，佢老公、立法會旅遊界議員阿Paul謝偉俊尋日就喺立法會二○一二年行政長官及立法會產生辦法建議方案小組委員會會議上，借機為老婆出番啖氣。
阿Paul發言時唔係講政改，憤言自己二○○○年參加港島區直選，公布結果時大家只會戥贏嘅高興，但今次立法會補選凸顯香港文明大倒退，又話：「佢（白姐姐）有氣量，明知面對暴民都上台，但我哋香港政黨，包括在座嘅政治領袖，唔單止唔阻止會員、黨員做呢啲嘢，反而仲帶頭對輸嘅人百般攻擊、嘲弄！」
佢跟住矛頭直指在座嘅公文袋黨魁余若薇，指自己係專業出身，過往好尊重公文袋理性討論嘅態度，但覺得依家公文袋「做爛仔，同爛仔一齊」，令人失望。
話聲一落，余若薇即以規程問題打斷阿Paul嘅發言，仲冷嘲熱諷咁話明白阿Paul嘅「親愛的」落選而心存怨憤，之後要求小組委員會主席叫阿Paul收番對公文袋嘅侮辱說話，又指阿Paul嘅發言同會議主題冇關，要主席裁決終止對方再大肆批評。兩人你一言、我一語，主席根本無從插嘴，最終只提醒各議員唔好互相指摘就拿拿臨宣布會議結束。