點解忽然搵咁多同政黨有關嘅人入局？鄉議局主席劉皇發笑笑口咁話：「鄉議局係聯合國嘛，我哋會向所有人示好！」但講到將來最切身嘅選舉問題，局方究竟撐建仔定係富貴黨先？發叔好肯定咁話：「梗係幫自己人啦！如果佢（田北辰）對鄉議局有期望，佢就自己諗清楚喇！」

仲記得○八年立法會選舉一役，當時富貴黨嘅正副主席田北俊同周梁淑怡喺新界東同新界西雙雙敗北，事後有人埋怨發叔喺新界西幫身兼鄉議局副主席、建仔成員嘅張學明，幫對家唔幫黨友掀起大風波，最終發叔退出富貴黨，稍後仲加盟喺富貴黨分裂出嚟另起爐灶嘅經濟動力。

既然同富貴黨唔啱傾，發叔點解又搵田二少入鄉議局呢？唔通係想同富貴黨修好？點都好啦，咁田二少入到去幫到乜嘢手先？發叔話可以喺基建發展同全國人大代表層面幫到鄉議局喎！