獲資助嘅大學生嚟自九間大學，有法律生去上海、南京兩地法院實習，亦有護理系生去廣東省中醫院臨床部做交流。蔡冠深話香港學生雖然醒目，但缺乏內地人事脈絡，將來北上發展好蝕底。

送大仔去瀋陽打暑期工

蔡會長都曾將大仔送咗去瀋陽打暑期工，囝囝依家喺加拿大讀緊大學三年級，主修電腦。佢話囝囝返工冇特權，連送信畀部長都要做埋。要囝囝去捱苦其實有苦心嘅，佢話北京、上海等大城市繁榮如香港，二線城市反而商機處處。

梗係啦，蔡會長係已故漁業大王蔡繼有嘅接班人，蔡家嘅新華集團喺瀋陽扎根二十年，早前更斥資二十幾億元投建瀋陽國際金融中心，囝囝喺瀋陽打工，將來大可幫手打理家族生意。