尋日見到匯賢智庫立法會議員葉劉淑儀一身Armani套裝，再配個鴕鳥皮鞋同手袋，去邊呀？原來係去灣仔會展參加一個武漢新港香港推介會。佢話着得咁隆重皆因早前帶大專生坐高鐵去武漢考察期間，獲當地有關部門同組織殷勤接待，期間認識咗好多朋友，所以武漢來港招商，佢亦禮尚往來着靚啲去撐場喎！
講開佢一手栽培嘅南區區議員Ronald陳岳鵬獲聘為特首辦特別助理，葉劉堅稱背後冇政治交易，只係特首辦睇中Ronald。至於Ronald英語水平會唔會好過都做過同一職位嘅立法會議員陳克勤，葉劉先話唔敢評論，跟住就話Ronald相當好㗎！擺明係賣花讚花香啦！
對於公文袋話立法會補選有五十幾萬人投票，係○三年七一遊行以嚟最大規模嘅群眾運動，葉劉話若以政治議題發動補選，咁嘅講法係啱嘅，反映有投票嘅選民對政改方案同政府好有意見，所以從政嘅人不可忽視。