立法會尋日安排預習宣誓，但社民連兩個議員好似一心搞事咁，黃毓民同上次一樣標奇立異用普通話宣誓，「大舊」陳偉業仲擅自更改誓詞：「本人定當擁護……吧吧吧吧，盡忠職守，掟蕉掃場……」事後二人異口同聲話宣誓嘅過程好莊嚴，所以佢哋今日唔打算喺宣誓途中生事，但宣誓完畢後就會好好「招呼」在座嘅官員。官員避唔到，煲呔曾都走唔甩，睇怕遲啲佢去立法會出席答問大會，實畀人狂蕉亂掟啦！

仲記得公社兩黨議員辭職當日，五名議員準備咗演辭，但建制派拉隊離場以示抗議，最終流會收場，令五人冇機會喺立法會發表「公投」言論，已紀錄在案。掟蕉三人組今次重返議會又點會唔報復吖！黃毓民同大舊尋日挑釁建制派，話建制派既然唔認同佢哋嘅行為，就應該學社民連搞議會抗爭，喺佢哋宣誓時再次拉隊離場，黃毓民笑言：「一件污，兩件穢，反正都做過一次啦！」

大舊將提報告上聯合國

大舊仲話會將喺「五區公投」期間發生嘅事件做一份報告，交畀聯合國人權委員會。講到立法會搞事又點能唔提「長毛」梁國雄，但佢尋日因背痛冇出席預習，不過預告今日一定會搞事。

喺咁嘅形勢，建制派議員點招架呢？建制派議員話冇諗過任何策略對付佢哋，亦唔會拉隊走人，因為公眾會將佢哋嘅表現看在眼裏，記在心上。工聯會王國興就話由得社民連搞事，今日決定喺宣誓時離開議事廳，費事睇到眼火爆。