事發時一架綠色小巴駛到十字路中間同一架的士突然相撞，小巴失控狂撞路邊圍欄，兩個乘客被拋出車外，小巴好似籃球入樽咁插落五公尺深嘅行人隧道，當場傳出砰砰巨響。的士就猛打白鴿轉，車內一男一女乘客慘被搖骰仔，頭部猛撞兩邊車窗，女乘客仲拋出車外。

關於出事原因，警方講得唔清唔楚，一時話唔排除有人超速、衝紅燈，一時又話或者係機件故障，仲話出事地點係交通黑點。

有區議員踢爆，出事現場原本裝有影快相裝置，但半年前未經諮詢就被拆走。咁就奇嘞，既然係交通黑點，點解又要將裝置拆走？仲要偷偷摸摸拆添。

運輸署就死撐，話嗰度唔係交通黑點。兩個政府部門一個講一樣，叫人哋信邊個呀？不過，無論係唔係交通黑點，拆走影快相裝置都係戇居嘅，嗰度係十字路口，交通繁忙，隨時有機會出事。今年三月，附近就發生過車禍，一架專線小巴攔腰撞向私家車後翻側，十五人受傷。

話時話，一副影快相架生用得幾多錢吖，又唔阻地方，無端端拆咗佢做乜嘢？正如有區議員話齋，如果影快相裝置仲喺度，或者可以令司機警惕，減少意外發生。講到底，班官僚係少件事好過多件事，話之你死幾多人啦。

仲有呀，今次事故死傷咁嚴重，部分原因係出事小巴冇安裝安全帶，一撞車乘客就好似人肉飛彈咁拋出車外。如果裝咗安全帶，講唔埋可以避過一劫。

叮！唔講安全帶仲冇咁嬲，一講就把幾火。政府淨係識得喺電視賣廣告，呼籲乘客佩戴安全帶，仲話違例就要罰款。之不過，法例形同虛設，即使小巴裝咗安全帶，乘客唔佩戴，警方都隻眼開隻眼閉。

更弊嘅係，唔講真係唔知，原來全港仲有二千幾架小巴未安裝安全帶。因為法例只管新登記嘅小巴，之前嘅舊車就要分批更換。每次爆咗大鑊嘢，當局都話要加快進度，可惜得個噏字，件事一丟淡，就當冇其事。按現時嘅進度，全部更換要成十年，問你服未？

所以啫，太一叮忠告各位市民，以後搭小巴一定要打醒十二分精神，千祈唔好去見周公，唔係嘅話，自己變咗人肉飛彈都唔知發生乜嘢事。