總商會喺立法會代表林健鋒就話幾年前同Gary有一面之緣，今次係久別重逢。港美兩地有時差，Gary搭完長途機，竟然毫無倦容，見到名人攞部相機埋身要求合照，笑容滿臉，來者不拒。Gary此行率領龐大貿易代表團訪華，擺明為美國谷生意，尋日櫈都未坐暖，就同商務及經濟發展局局長劉吳惠蘭簽署合作諒解備忘錄，將美國五十個州嘅美酒帶到香港，又落力推銷「清潔能源」呢門生意，希望同香港、中國內地打開合作之門。係咪成事，就要睇Gary嘅牙力嘞。

大會設有問答環節，廠商會永遠名譽會長陳永棋單刀直入，問Gary會唔會做下屆美國總統，Gary笑言：「No，I am too old！」（不會，我太老了！）Gary謙稱做總統要有特別才幹同魅力，佢好享受依家嘅職位，閒來湊吓孫算嘞。