樓價不斷飆升，搞到民怨沸騰，雖然煲呔曾早前喺答問大會上認衰，話會用五個月諮詢各界對資助市民置業嘅意見，但明眼人一睇就知佢想拖延時間，市民當然唔收貨。為爭民心，疑似下屆特首候選人、行政會議召集人CY梁振英前排再做煲呔曾團隊嘅「黑羊」，撰文力撐復建居屋，當煲呔曾嘅諮詢冇到。
雖然煲呔曾一直冇出聲，但佢出名小器兼記仇，邊會咁易算數？煲呔曾尋日上電台節目，一講起居屋就以酸溜溜嘅語氣，話CY對樓房市場有一份執着，「講咗好多嘢」，擺明係窒CY太口多！香港社會唔和諧嘅氣氛，果然已經蔓延到政府嘅管治團隊入面！
煲呔曾仲煞有介事咁話CY係行會一分子，強調對復建居屋嘅所有討論「都要喺行政會議內發生」，講嘢句句有骨，好似老闆發「最後警告」畀員工咁！不過過去已經有太多次行會成員違反集體負責制，公開同政府唱反調嘅例子，煲呔曾依家先嚟以正視聽，就算有心都太遲嘞！