補選點票嗰晚群情洶湧，唔少公社兩黨嘅支持者都各自着住黃色同紅色嘅上衫到場聲援，而周澄嘅著名編劇媽媽岸西，亦以一身casual嘅打扮到場撐愛女。雖然岸西都係知名人士，但佢就冇搶到囡囡嘅風頭，不但拒應記者要求同周澄一齊合照，當周澄接受傳媒訪問嗰陣，佢亦只係坐埋一邊睇書等囡囡。雖然低調，但旁人亦不難感受到佢愛女之切。

周澄今次嘅成績喺大專2012當中都算係一枝獨秀，但佢就話未來想進修同參與多啲地區工作，暫時無意入黨或從政喎，所以下屆選舉就咪預佢嘞。

同樣成功攞到萬幾票嘅白姐姐，當日表現亦都相當風騷。佢話依家有萬幾人投票畀佢，證明好多人都想對黃毓民嘅暴戾政治Say No喎。咁點解讀黃毓民攞到嗰六萬幾票？佢就貫徹「語不驚人死不休」嘅作風，爆咗句：「呢個世界上有好多無知嘅人嘅！」令在場記者打咗個突。