之前講過立法會秘書長Pauline吳文華早前向行政管理委員會提議，畀佢部舊萬事得房車退役，換成豐田豪華七人車，爭取咗咁耐，新車日前終於落地，已經交到Pauline手中。
掛上「LC2」車牌嘅銀色豐田ALPHARD混合動力環保新車，上個星期已泊咗喺主席座駕「LC1」隔籬，隨時候命。部車有2,400cc，最搶眼係車頭一對十足鷹眼咁銳利嘅車頭燈。
豐田ALPHARD喺香港無人不曉，豪華車廂係其一大標記，今次Pauline嘅新座駕都唔例外，內櫳寬敞舒適，但非常慳油，符合環保原則。
咪以為係Pauline貪心換部咁大嘅車，查實佢賣身畀立法會，好少坐車外出。今次換新車無非為秘書處同事與議員着想，等佢哋出去開會或搞活動時，可以坐多幾個人。