政壇新星EQ葛珮帆喺二十三年前為咗唔想傷害動物而食素，結果換來健康身體，連帶皮膚都滑一滑，即使近距離檢視，都一樣係零毛孔，真係恨死好多愛膚之人。
EQ最近完成港大社會科學系嘅婚姻與家庭治療碩士，早幾日佢好友兼黨友、深水埗區議員Vincent鄭泳舜相約EQ去佢鍾情嘅「貴德宮」食私房素菜慶祝，李嘉欣、周汶錡、周麗淇等美女都係呢間素菜館嘅捧場客。
EQ同Vincent今次以清新嘅柚子沙律及小樹耳海珊瑚壽司拼盤作開始，酸酸甜甜令人食欲大增，之後湯餃、老火湯輪住上，最後以咖啡雜菜飯作結，每一道菜嘅味道與質感都有明顯分別。當中值得推介嘅「芝士焗彩菌批」，造型精緻，用上多種菇類，再配上薄薄嘅芝士鮮焗，相當惹味，加上分量少，食完都仲有位放其他。