喺港鐵中環站嘅出口，差唔多貫穿成個中環，大熱天時，唔少中環人喺食飯時間都喜歡喺呢個「地下城」穿梭，事關曬少啲，又可以涼吓冷氣，遇啱落雨仲唔使撐遮，超方便！好似港鐵行政總裁周松崗早幾日喺中環食完飯，一出嚟就向旁邊嘅港鐵站直行。
原來周總都係港鐵乘客，佢平時返工泊低架車就會搭港鐵線出入，到收工先揸番架車返屋企。除夠綠色外，依家港鐵好多個站頭都放有藝術品畀繁忙嘅都巿人欣賞，佢話自己行過都會望兩眼。
西港島線已動工，路線將由上環站向西伸延至堅尼地城，到時會喺西營盤、香港大學、堅尼地城設地下車站，全長約三公里。周總覺得西環一帶好有特色，港鐵計劃緊放啲舊香港特色嘅藝術品喺新起嘅沿線車站，等呢區嘅乘客可以緬懷吓呢啲香港人嘅集體回憶喎。