今年三月北京「兩會」期間，據了解，港澳辦最高領導曾下達新指令，政改方案要過就高票強勢通過，拉攏唔到普選聯十四票，都要白鴿黨九票，好似○八年咁想向民主派「打荷包」三、四票先至勉強過骨嘅做法，並不可取。中央真正着眼嘅唔係方案嘅生死，而係困擾香港多年嘅政改爭拗能否從此偃旗息鼓。所以有知情建制派人士估計特區政府叫立法會主席辭職投票，應係三月之前嘅事咯。

倘撐政改可「破冰」

據悉，當局上星期向普選聯打招呼，叫佢哋有心理準備見中央官員，事態有突破發展。記得四月十四日港府公布冇改政改方案，全國人大常委會副秘書長「喬老爺」喬曉陽下晝喺北京幫手遙距推銷，加上喬老爺過往多次南下講政改，要見普選聯，最直接係喬老爺出面「破冰」。

記得喬老爺曾經以「關公戰秦瓊」嘅故事形容與泛民之間嘅溝通，意思係大家要企喺同一平台至有得溝通。呢個故事套用當今政改格局，不謀而合；如果普選聯否決政改方案立場強硬，同中央處身不同平台，點溝通？

不過消息話，特區政改循序漸進，中央官員與普選聯溝通亦要循序漸進，按當前情況，究竟使唔使由中聯辦同佢哋見面都未知。如果普選聯自亂陣腳，好似四月十四日同「公投派」議員咁排排企狠批政改方案，與會嘅「中央官員」官階就可能更低。若然普選聯有誠意支持方案，喬老爺最後先會自己出面。總之一切存在變數，好戲在後頭！

白鴿黨主席何俊仁同普選聯召集人馮偉華都承認收到將與中央官員見面嘅消息，但強調時、地、人就乜都未知，而佢哋承認後日會同政制及內地事務局局長林瑞麟見面，談及同中央官員會面嘅事宜。